Fulli kallinn!

Ég sat með tölvuna á Mið-bar um daginn að horfa á fótbolta og þegar leikurinn var búinn sat ég aðeins áfram og yfirheyrði þá smá samræður. Ég er nokkuð fljótur að rita á tölvu en ég náði ekki að halda í við þá aðila sem ræddu málin þau skiptu svo oft um málefni. Við borðið sátu kona og tveir karlar:

Karl 1.: Norðmenn bíða bara eftir okkur!

Karl 2.: Já, heimskingjarnir vilja fara í ESB!

Karl 1.: Af hverju ættum við ekki að fara í Evrópusambandið?

Karl 2.: Við höfum ekkert í það að gera

Karl 1.: Treystiru þessum glæpamönnum sem stjórna landinu til að halda genginu stöðugu?

Karl 2.: Norðmenn bíða eftir Íslendingum, ef að við myndum gera svona (smellir fingrum) þá kæmu þeir líka!

Karl 1.: Það vantar bara einn norrænan Hitler.

Karl 2.: Þú talar í viðtengingarhætti... hvað er þetta?

Karl 1.: Hvað er viðtengingaháttur?

Karl 2.: Eina vitið væri að taka stafina þ-æ-ö og allt þetta drasl úr málinu!

Karl 1.: Það myndi spara tölvukerfunum okkar 500 milljónir á ári!

Karl 2.: Það á að vera löngu farið og ð-ið líka og y!

Karl 1.: Hvernig skrifar þú ufsilon?

Karl 2.:Hvernig skrifar þú það?

Karl 1.: Nei, ég er að spurja þig, hvernig skrifaru það?

Karl 2.: Ufsilon

Karl 1.: Það er vitlaust hjá þér!

Karl 2.: Nú, hvernig skrifar þú það?

Karl 1.: Ég ætla ekkert að fara leiðrétta þig... en þetta er vitlaust hjá þér

Konan: Hann man bara ekkert hvernig það er skrifað

Karl 1.: Talandi um muna, hver er grunnur orðsins "muna"?

Karl 2.: mynna, muna, mundi

Þarna tapaði ég einbeitningunni enda var rokið úr einu í annað áfram, umræðan sem fylgdi var um einfalt I og tvöfalt I og svo fór Karl 1. yfir í siglingarfræði og kenndi þeim allt um það enda var hann einstaklega fær um að skipta um umræðuefni þegar viska hans var á enda í því málefni sem í umræðunni var.

Fullt að gerast þessa dagana skólinn að byrja og ný vinna að byrja í næstu viku. Að því undanskildu hef ég verið að gera ýmislegt síðustu mánuði aðalega tengt fótbolta. Mikið hefur verið tekið af myndum en á netinu eru þó einna helst til myndir af skemmtunum sem öllu þessu fylgir þökk sé Sigga Gústafs og nýju myndavélinni hans. Það lítur kanski ekki vel út þegar menn eru með öl á hverri mynd en einu skiptin sem að Siggi mætir með vélina er einmitt þegar öl er við hönd. Hann hefur t.d. mætt á fleiri skemmtanir en æfingar í sumar sem segir allt sem segja þarf. Þrátt fyrir það er hann ómetanlegur hluti af liðsheildinni eins og allir sem að félaginu koma.

Hér eru nokkrar af þeim myndum sem ljósmyndarinn Gú og aðrir sem náð hafa myndavélinni hafa tekið síðustu vikur: